అలెక్సీ నవాల్నీ: పుతిన్‌ను ఎదిరించిన నేతతో పెళ్లిపై యూలియా నవాల్నియా ఏమన్నారు?

సాధారణ జీవితం గడిపిన అలెక్సీ నవాల్నీ భార్య యూలియా నవాల్నియా, తాను జీవితంలో భార్యగా, తల్లిగానే ప్రధానపాత్ర పోషించాను కానీ, రాజకీయ నాయకురాలిగా కాదని గట్టిగా చెప్పారు.

కానీ, శుక్రవారం ఆమె భర్త మరణం, మ్యూనిచ్ సెక్యూరిటీ కాన్ఫరెన్స్‌లో న్యాయం కోసం ఆమె చేసిన భావోద్వేగపూరిత విజ్ఞప్తితో, రష్యా ప్రతిపక్షంలో ఆమె ప్రధాన వ్యక్తిగా కనిపిస్తున్నారు.

ఆమె ఎప్పుడూ భర్తకు తోడుగా నిలిచారు. 2020లో నోవిచోక్ నర్వ్ ఏజెంట్‌తో విషప్రయోగం జరిగినప్పుడు అలెక్సీ నవాల్నీని అత్యవసర చికిత్స కోసం రష్యా నుంచి బయటకు తీసుకెళ్లడంలో ఆమె కీలక పాత్ర పోషించారు. నోవిచోక్ - రసాయనాలతో కూడిన విషం, రసాయన యుద్ధం కోసం ఇలాంటి వాటిని ఆయుధాలుగా తయారుచేశారు, ఇవి నరాలపై పనిచేస్తాయి.

ఆమెను రష్యాలో ప్రతిపక్షానికి చెందిన ప్రథమ మహిళగా వర్ణించారు.